ఢిల్లీలోకి ‘నాన్-BS6’ వాహనాలకు నో ఎంట్రీ.. నవంబర్ 1 నుంచి ఆంక్షలు.. 10 లక్షల వాహనాలపై ప్రభావం

జాతీయం, అక్టోబర్ 28, 2026: దేశ రాజధాని ఢిల్లీలో వాయు కాలుష్యాన్ని నియంత్రించేందుకు ఢిల్లీ ప్రభుత్వం కీలక నిర్ణయం తీసుకుంది. శీతాకాలంలో ప్రమాదకరంగా మారే గాలి నాణ్యతను (Air Quality) మెరుగుపరిచేందుకు, వింటర్ పొల్యూషన్-కంట్రోల్ ఫ్రేమ్‌వర్క్ కింద ‘నాన్-BS6’ (BS-III, BS-IV) వాహనాల ప్రవేశంపై నిషేధం విధించింది. నవంబర్ 1, 2026 నుంచి జనవరి 31, 2027 వరకు ఈ ఆంక్షలు కఠినంగా అమల్లో ఉండనున్నాయి.

ఈ నిర్ణయం వల్ల ఢిల్లీకి పొరుగున ఉన్న నేషనల్ క్యాపిటల్ రీజియన్ (NCR) నగరాలైన గురుగ్రామ్, ఫరీదాబాద్, నోయిడా, గ్రేటర్ నోయిడా, ఘజియాబాద్‌ల నుంచి ప్రతిరోజూ ఢిల్లీకి వచ్చే దాదాపు 10 లక్షల వాహనాలపై నేరుగా ప్రభావం పడనుందని రవాణా శాఖ అధికారులు అంచనా వేస్తున్నారు.

నిబంధనలు ఏం చెబుతున్నాయి?ఢిల్లీ రవాణా శాఖ జారీ చేసిన మార్గదర్శకాల ప్రకారం.. ఢిల్లీ వెలుపల రిజిస్ట్రేషన్ అయ్యి ఉండి, భారత్ స్టేజ్-VI (BS-VI) ఉద్గార ప్రమాణాలు పాటించని పెట్రోల్, డీజిల్ వాహనాలు ఢిల్లీ సరిహద్దులు దాటి లోపలికి రావడానికి వీల్లేదు. ఎవరైనా నిబంధనలు ఉల్లంఘిస్తే భారీ జరిమానాలు విధించే అవకాశం ఉంది. ఢిల్లీ సరిహద్దుల వద్ద వాహనాలను అడ్డుకునేందుకు ప్రత్యేక బృందాలను మోహరించనున్నారు. దీనితో పాటు నగరంలో ‘సరైన పీయూసీ (PUC – పొల్యూషన్ అండర్ కంట్రోల్) సర్టిఫికెట్ లేకపోతే ఇంధనం లేదు’ అనే నిబంధనను పెట్రోల్ బంకుల్లో అమలు చేస్తున్నారు.

మినహాయింపులు ఎవరికి? ఈ ఆంక్షల నుంచి కొన్ని వాహనాలకు ప్రభుత్వం మినహాయింపునిచ్చింది.

• ఎలక్ట్రిక్ వాహనాలు (EVs)
• సీఎన్‌జీ (CNG) తో నడిచే వాహనాలు
• అంబులెన్సులు, ఫైర్ ఇంజన్ల వంటి అత్యవసర సేవల వాహనాలు
• ప్రభుత్వ విధుల్లో ఉండే వాహనాలు
• BS-VI ప్రమాణాలు కలిగిన ఇతర రాష్ట్రాల వాహనాలు యథావిధిగా ఢిల్లీలోకి ప్రవేశించవచ్చు.

ఎన్‌సీఆర్ నగరాలపై తీవ్ర ప్రభావం:అధికారిక గణాంకాల ప్రకారం.. గురుగ్రామ్, ఫరీదాబాద్‌లలో కలిపి దాదాపు 2 లక్షల నాన్-BS6 వాహనాలు ఉన్నాయి. అలాగే, నోయిడా, గ్రేటర్ నోయిడాలలో 4 లక్షలు, ఘజియాబాద్‌లో మరో 4 లక్షల వాహనాలు BS-VI ప్రమాణాలు లేకుండా నడుస్తున్నాయి. ఢిల్లీలో కాలుష్య స్థాయిలు ఇప్పటికే పెరుగుతుండటంతో, గ్రేడెడ్ రెస్పాన్స్ యాక్షన్ ప్లాన్ (GRAP) కింద ఈ ముందస్తు కఠిన చర్యలు అమలు చేస్తున్నారు. పొరుగు రాష్ట్రాల నుంచి ఢిల్లీకి వచ్చే ప్రయాణికులు ముందే తమ వాహనాల కాలుష్య ప్రమాణాలను తనిఖీ చేసుకోవాలని అధికారులు సూచిస్తున్నారు.