బంగ్లాదేశ్ జైళ్లలో మగ్గుతున్న 238 మంది భారతీయులు.. క్లారిటీ ఇచ్చిన హైకమిషన్

జాతీయం, అక్టోబర్ 23, 2026: బంగ్లాదేశ్‌లోని వివిధ జైళ్లలో వందలాది మంది భారతీయులు మగ్గుతున్నారంటూ వస్తున్న వార్తలపై ఢాకాలోని భారత హైకమిషన్ స్పందించింది. బంగ్లాదేశ్ పత్రిక ‘ది డైలీ స్టార్’ ప్రచురించిన గణాంకాలను తోసిపుచ్చిన హైకమిషన్, జాతీయత నిర్ధారణలో ఉన్న సమస్యల వల్లే ఈ గందరగోళం నెలకొందని స్పష్టం చేసింది.

‘ది డైలీ స్టార్’ కథనంలో ఏముంది? డ్రగ్స్ రవాణా, స్మగ్లింగ్ తదితర నేరాల కింద బంగ్లాదేశ్‌లో మొత్తం 407 మంది విదేశీయులు శిక్ష అనుభవిస్తున్నారు. వీరిలో సగానికి పైగా, అంటే 238 మంది భారతీయులే ఉన్నారని ‘ది డైలీ స్టార్’ తన తాజా కథనంలో పేర్కొంది. అంతేకాకుండా, వీరిలో 168 మంది భారతీయ ఖైదీల శిక్షాకాలం పూర్తయినప్పటికీ వారిని ఇంకా జైళ్లలోనే ఉంచారని, విడుదల చేయలేదని ఆ నివేదిక ఆరోపించింది.

ఖండించిన భారత హైకమిషన్ ఈ కథనంపై స్పందించిన భారత హైకమిషన్ అధికారి.. పత్రిక పేర్కొన్న గణాంకాలను ఖండించారు. శిక్షాకాలం పూర్తయినట్లు అధికారికంగా ధ్రువీకరించబడిన భారతీయుల సంఖ్య కేవలం 25 మాత్రమేనని ఆయన స్పష్టం చేశారు. మిగిలిన ఖైదీల జాతీయతను నిర్ధారించడంలో సాంకేతిక మరియు చట్టపరమైన సమస్యలు ఉన్నాయని, అందుకే ఈ జాప్యం జరుగుతోందని వివరించారు.

జైలు అధికారుల ఆందోళన మరోవైపు, శిక్షాకాలం పూర్తయిన తర్వాత కూడా విదేశీ ఖైదీలను జైళ్లలోనే ఉంచాల్సి రావడంపై బంగ్లాదేశ్ జైలు అధికారులు తీవ్ర ఆందోళన వ్యక్తం చేస్తున్నారు. ఖైదీల జాతీయత నిర్ధారణ జరగకపోవడంతో వారిని స్వదేశాలకు పంపలేకపోతున్నామని, ఇది తమకు నిర్వహణపరమైన అదనపు భారాన్ని మిగుల్చుతోందని జైలు అధికారులు వాపోతున్నారు. త్వరితగతిన ఈ సమస్యను పరిష్కరించాలని వారు ఇరు దేశాల అధికారులను కోరుతున్నారు.