గాల్లో ఎయిర్ ఇండియా విమానానికి ‘హైజాక్’ అలర్ట్.. జైపూర్‌లో అత్యవసర ల్యాండింగ్!
న్యూఢిల్లీ, అక్టోబర్ 14, 2026: ఫ్రాంక్‌ఫర్ట్ నుంచి ఢిల్లీ వస్తున్న ఎయిర్ ఇండియా విమానంలో తీవ్ర కలకలం రేగింది. విమానానికి ‘హైజాక్’ అలర్ట్ రావడంతో పైలట్లు తక్షణమే స్పందించి, విమానాన్ని జైపూర్ విమానాశ్రయానికి మళ్లించి అత్యవసరంగా ల్యాండింగ్ (Emergency Landing) చేశారు.
జర్మనీలోని ఫ్రాంక్‌ఫర్ట్ నుంచి బయలుదేరిన ఈ ఎయిర్ ఇండియా విమానం బుధవారం ఉదయం 9 గంటల ప్రాంతంలో భారత గగనతలంలోకి ప్రవేశించింది. ఆ సమయంలోనే విమానంలోని పైలట్ల నుంచి ఎయిర్ ట్రాఫిక్ కంట్రోల్ (ATC)కి ‘స్వాక్ 7500’ (Squawk 7500) కోడ్ సందేశం వెళ్లింది. విమానం హైజాక్‌కు గురైనప్పుడు లేదా తీవ్ర ముప్పు పొంచి ఉన్నప్పుడు పైలట్లు నియంత్రణ గదికి ఈ రకమైన అత్యవసర కోడ్‌ను పంపిస్తుంటారు.
ఈ సిగ్నల్ అందిన వెంటనే ఏటీసీ అధికారులు అత్యంత వేగంగా స్పందించి, కేంద్ర భద్రతా ఏజెన్సీలు మరియు విమానాశ్రయ భద్రతా సిబ్బందిని అప్రమత్తం చేశారు. ఢిల్లీ చేరుకోవాల్సిన విమానాన్ని వెంటనే రాజస్థాన్‌లోని జైపూర్ ఎయిర్‌పోర్టుకు మళ్లించి అక్కడ భద్రతా ఏర్పాట్ల మధ్య సురక్షితంగా ఎమర్జెన్సీ ల్యాండింగ్ చేయించారు.
విమానం ల్యాండ్ అయిన వెంటనే భద్రతా బలగాలు ప్రయాణికులను సురక్షిత ప్రాంతానికి తరలించి, తనిఖీలు చేపట్టాయి. విమానంలో సాంకేతిక లోపం వల్ల ఈ కోడ్ వెళ్ళిందా లేదా మరేదైనా కారణం ఉందా అనే కోణంలో భద్రతా అధికారులు విచారణ జరుపుతున్నారు.