తెలంగాణలో సీనియర్ సిటిజన్లకు ఉచిత బస్సు ప్రయాణం.. త్వరలో విధివిధానాలు!
హైదరాబాద్, అక్టోబర్ 2, 2026: తెలంగాణ రాష్ట్రంలో మహిళలకు అమలు చేస్తున్న ఉచిత బస్సు ప్రయాణ సౌకర్యం తరహాలోనే, వృద్ధులకు కూడా తీపికబురు అందించేందుకు రాష్ట్ర ప్రభుత్వం సన్నాహాలు చేస్తోంది. రాష్ట్రవ్యాప్తంగా సీనియర్ సిటిజన్లకు ఉచిత బస్సు ప్రయాణ సౌకర్యం కల్పించే ప్రతిపాదనను ప్రభుత్వం చురుగ్గా పరిశీలిస్తున్నట్లు రాష్ట్ర రవాణా శాఖ మంత్రి పొన్నం ప్రభాకర్ వెల్లడించారు.
పరిశీలనలో ఉచిత బస్ పాస్‌ల జారీ.. సీనియర్ సిటిజన్లకు ఆర్టీసీ బస్సుల్లో ఉచిత ప్రయాణం కోసం ప్రత్యేక బస్ పాస్‌లు జారీ చేసే అంశం ప్రభుత్వం దృష్టిలో ఉందని మంత్రి స్పష్టం చేశారు. ప్రస్తుతం రవాణా శాఖ, ప్రభుత్వ ఉన్నతాధికారుల మధ్య ఈ అంశంపై ప్రాథమిక స్థాయిలో చర్చలు జరుగుతున్నాయని తెలిపారు.
త్వరలో వయోపరిమితి, అర్హతల ఖరారు.. ఈ ఉచిత ప్రయాణ పథకం అమలుకు సంబంధించి లబ్ధిదారుల అర్హతలు, వయోపరిమితి, ఇతర విధివిధానాలను ఇంకా ఖరారు చేయాల్సి ఉందని మంత్రి పొన్నం చెప్పారు. ఏ వయసు పైబడిన వారికి ఈ అవకాశం కల్పించాలి? పాస్‌ల జారీ ప్రక్రియ ఎలా ఉండాలి? అనే అంశాలపై స్పష్టమైన నిబంధనలు రూపొందించిన అనంతరం పూర్తి వివరాలను అధికారికంగా వెల్లడిస్తామన్నారు. ఈ నిర్ణయం సాకారమైతే రాష్ట్రంలోని లక్షలాది మంది వృద్ధులకు భారీ ఊరట లభించనుంది.