బెంగుళూరులో ఈసీ ‘SIR’ పై భారీ నిరసన.. పాల్గొన్న ధృవ్ రాఠీ, ప్రకాష్ రాజ్..!

బెంగళూరు, అక్టోబర్ 8, 2026 : కేంద్ర ఎన్నికల సంఘం (ECI) ఓటర్ల జాబితాల ప్రక్షాళన కోసం చేపట్టిన స్పెషల్ ఇంటెన్సివ్ రివిజన్ (SIR) ప్రక్రియకు వ్యతిరేకంగా బెంగళూరులోని ఫ్రీడమ్ పార్క్‌లో అక్టోబర్ 8న భారీ నిరసన కార్యక్రమం జరిగింది. కాక్రోచ్ జనతా పార్టీ (CJP), ఇతర పౌర సమాజ సంఘాల ఆధ్వర్యంలో ‘పీపుల్స్ ట్రిబ్యునల్’ పేరిట జరిగిన ఈ సభలో ప్రముఖ యూట్యూబర్ ధృవ్ రాఠీ, విలక్షణ నటుడు ప్రకాష్ రాజ్, సీజేపీ వ్యవస్థాపకుడు అభిజిత్ డిప్కే సహా పలువురు కార్యకర్తలు, విద్యార్థులు, ఓటర్ల జాబితా నుంచి పేర్లు గల్లంతైన బాధితులు పాల్గొన్నారు.

ఏమిటీ SIR? ఎందుకు వ్యతిరేకిస్తున్నారు? ఓటర్ల జాబితాను ప్రక్షాళన చేయడానికి, చనిపోయిన, వలస వెళ్లిన లేదా అనర్హులైన వారి పేర్లను తొలగించడానికి కేంద్ర ఎన్నికల సంఘం (ECI) చేపట్టిన ఇంటింటి వెరిఫికేషన్ ప్రక్రియే ఈ ‘SIR’. ఇది పూర్తిగా చట్టబద్ధమైన ప్రక్షాళన ప్రక్రియ అని ఈసీ స్పష్టం చేస్తోంది. అయితే, డ్రాఫ్ట్ దశలోనే దేశవ్యాప్తంగా సుమారు 13 కోట్ల పేర్లను అక్రమంగా తొలగించారని విమర్శకులు ఆరోపిస్తున్నారు. ఇందులో పారదర్శకత లేదని, మైనారిటీలు, ఆదివాసీలను లక్ష్యంగా చేసుకుని ఓట్లను తొలగిస్తున్నారని నిరసనకారులు మండిపడుతున్నారు. దీనిని “ఓటు చోరీ” గా అభివర్ణిస్తూ, చీఫ్ ఎలక్షన్ కమిషనర్ (సీఈసీ) జ్ఞానేష్ కుమార్ రాజీనామా చేయాలని, SIR ను రద్దు చేయాలని డిమాండ్ చేస్తూ దేశవ్యాప్తంగా ఆందోళనలు జరుగుతున్నాయి.

నిరసనలో ప్రముఖుల కీలక వ్యాఖ్యలు:

• అభిజిత్ డిప్కే (CJP వ్యవస్థాపకుడు): ప్రాణాలతో ఉన్నవారిని కూడా చనిపోయినట్లుగా రికార్డుల్లో చూపిస్తూ ఓట్లను తొలగిస్తున్నారని ఆయన ఆరోపించారు. ఒకే దేశం, ఒకే పార్టీ అనే అజెండాతో ప్రభుత్వమే ఈ కుట్రకు తెరలేపిందని, యువత దీనిపై పోరాడాలని పిలుపునిచ్చారు.
• ప్రకాష్ రాజ్ (నటుడు): SIR ప్రక్రియ పౌరుల హక్కులు, గౌరవంపై జరుగుతున్న దాడిగా ప్రకాష్ రాజ్ అభివర్ణించారు. కేవలం సీఈసీని తొలగించడం మాత్రమే కాకుండా, ఈ SIR ప్రక్రియను పూర్తిగా రద్దు చేయాలన్నారు. ఎవరు పాలించాలో ప్రజలు నిర్ణయించే హక్కును లాక్కుని, ఎవరు ఓటు వేయాలో ప్రభుత్వమే నిర్ణయించే పరిస్థితి రావడం ప్రజాస్వామ్యానికి ప్రమాదకరం అన్నారు.
• ధృవ్ రాఠీ (యూట్యూబర్): కర్ణాటకలోని 100 పోలింగ్ స్టేషన్లలో జరిగిన అవకతవకలపై ఆయన ఒక నివేదికను విడుదల చేశారు. ఎన్నికల సంఘంలో జవాబుదారీతనం, పారదర్శకత శూన్యమని విమర్శించారు. తాను ఏ ప్రభుత్వం మారాలనో ఇక్కడికి రాలేదని, ప్రజాస్వామ్యాన్ని రక్షించుకోవడానికే వచ్చానని స్పష్టం చేశారు.

ఈ కార్యక్రమంలో కన్నడ రచయిత దేవనూరు మహాదేవ కూడా పాల్గొన్నారు. భాల్కి, బబలేశ్వర్ తాలూకాలకు చెందిన పలువురు ఓటర్లు.. తాము అక్కడే నివసిస్తున్నప్పటికీ ఓటర్ల జాబితాలో తమ పేర్ల పక్కన “వలస వెళ్లారు” లేదా “హాజరు కాలేదు” అని రాసి ఓట్లను ఎలా తొలగించారో సభకు వివరించారు. మహిళలకు మద్దతుగా “చప్పల్ ప్రొటెస్ట్” కూడా నిర్వహించారు. నిరసనకారులు “ఎర్రర్ 404 – నేమ్ నాట్ ఫౌండ్”, “జ్ఞానేష్ కుమార్ గద్దె దిగాలి” తదితర ప్లకార్డులు ప్రదర్శించారు.

గతంలో ఢిల్లీలో రాహుల్ గాంధీ, ప్రియాంక గాంధీ తదితరుల ఆధ్వర్యంలో జరిగిన నిరసనలకు కొనసాగింపుగానే బెంగళూరులో ఈ కార్యక్రమం నిర్వహించినట్లు నిర్వాహకులు తెలిపారు.