‘జమిలి’ పేరుతో భారీ కుట్ర.. కేంద్రం ప్లాన్ బయటపెట్టిన అభిజీత్‌ దీప్కే!
న్యూఢిల్లీ, అక్టోబర్ 06, 2026: కేంద్ర ప్రభుత్వం ప్రతిష్ఠాత్మకంగా తీసుకురావాలని భావిస్తున్న ‘జమిలి ఎన్నికల’ (ఒకే దేశం.. ఒకే ఎన్నిక) వెనుక పెద్ద కుట్ర దాగి ఉందని కాక్రోచ్‌ జనతా పార్టీ (CJP) వ్యవస్థాపకుడు అభిజీత్‌ దీప్కే తీవ్ర ఆరోపణలు చేశారు. ‘ఒకే దేశం – ఒకే ఎన్నిక’ నినాదం పేరుతో భవిష్యత్తులో దేశంలో ‘ఒకే దేశం – ఒకే రాజకీయ పార్టీ’ వ్యవస్థను తీసుకురావాలని కేంద్రం యోచిస్తోందని ఆయన విమర్శించారు.
ప్రధాన ఎన్నికల కమిషనర్ (సీఈసీ) జ్ఞానేశ్‌కుమార్‌ వెంటనే తన పదవికి రాజీనామా చేయాలని, లేనిపక్షంలో ఈ నెల 10న ఢిల్లీలోని జంతర్ మంతర్ వద్ద శాంతియుత నిరసన చేపడతామని సీజేపి ఇప్పటికే హెచ్చరించిన విషయం తెలిసిందే. అయితే, ఈ నిరసన కార్యక్రమాన్ని అడ్డుకునేందుకు మహారాష్ట్ర పోలీసులు తమ పార్టీ కార్యకర్తలపై తీవ్ర ఒత్తిడి తెస్తున్నారని దీప్కే మండిపడ్డారు. శనివారం జరగనున్న ఈ ఆందోళనలో పాల్గొనవద్దంటూ చంద్రపూర్ పోలీసులు సీజేపి కార్యకర్తలకు నోటీసులు జారీ చేయడం, వారి ప్రయాణ ఖర్చుల గురించి ఆరా తీయడంపై ఆయన ఆశ్చర్యం వ్యక్తం చేశారు.
“ఇప్పటివరకు మహారాష్ట్ర పోలీసులు దేశంలోనే అత్యుత్తమమని, ఢిల్లీ పోలీసులు వారిని చూసి నేర్చుకోవాలని నేను పలుమార్లు ప్రశంసించాను. కానీ శాంతియుత నిరసన ప్రారంభం కాకముందే అది హింసాత్మకంగా మారుతుందని పోలీసులు ఎలా ఊహిస్తారు? సోషల్ మీడియాలో హింసాత్మక పోస్టులు పెట్టవద్దని నోటీసుల్లో పేర్కొన్నారు. మేము అంబేడ్కర్‌, మహాత్మాగాంధీ సిద్ధాంతాలు, భావజాలం గురించి మాత్రమే మాట్లాడతాం. అవి పోలీసులకు హింసాత్మకంగా కనిపిస్తున్నాయా?” అని దీప్కే సూటిగా ప్రశ్నించారు.